কেতিয়াবা কিবা কাৰণত, কিবা ঘটনা ঘটিলে, কোনোবাই কিবা ক’লে, বেয়া ব্যৱহাৰ কৰিলে, পুৰণি বেয়া স্মৃতি মনত পৰিলে আপোনাৰমনটো বেয়া লাগিব পাৰে৷ তেতিয়া একো কৰিবলৈ, ক’বলৈ আপোনাৰ মন নাযাব আৰু দিনটোৰ সময়খিনি বেয়া হৈ যাব পাৰে৷ কিন্তু বেয়া লাগি থাকিলেও এই বেয়া লগা ভাবটো সলাব পাৰি৷
আপোনাৰ যদি মনটো বেয়া লাগি আছে, তেন্তে ইয়াক লগে লগে ভাল কৰি তোলাৰ এটা সহজ-সৰল উপায় আছে৷ আপুনি ঘৰতে বহি এয়া কৰিব পাৰিব, বেছি সময়ো নালাগে৷ কেইমিনিট মানৰ ভিতৰতে আপোনাৰ মনটো ভাল লাগি যাব৷
আপোনাৰ অতীতলৈ ঘূৰি যাওক আৰু তাৰপৰা আপোনাৰ খুব ভাল লগা, অনবৰতে মনত পৰা এটা সুন্দৰ স্মৃতি মনলৈ আনক৷ এটা বিশেষ ঘটনা যি সম্পূর্ণৰূপে পজিটিভ৷ কৰবাত আপুনি কিবা পুৰস্কাৰ পাইছিল, কোনোবাই আপোনাৰ বিষয়ে বহুত ভালকৈ কৈছিল, আপুনি বিচৰা বস্তুটো পাইছিল, আপোনাৰ জীৱনৰ কিবা এটা উল্লেখনীয় পজিটিভ ঘটনা তেনে ধৰণৰ কিবা এটা স্মৰণীয় স্মৃতি৷
প্ৰথমে চকু দুটা মুদি লওক৷ এতিয়া সেই ঘটনাটোৰ কথা মনলৈ আনিবলৈ চেষ্টা কৰক৷ চিনেমা হলৰ যিখন স্ক্ৰিণ থাকে তেনে এখন ডাঙৰ স্ক্ৰিণত গোটেই ঘটনাটো সম্পূর্ণৰূপে, একেবাৰে পৰিস্কাৰকৈ চাবলৈ চেষ্টা কৰক৷ এইচ ডি চিনেমা এখন চালে যিমান পৰিস্কাৰ হয় সিমান পৰিস্কাৰভাৱে এই চিনেমাখন আপুনি চাবলৈ চেষ্টা কৰক৷ কোনে কি ৰঙৰ কাপোৰ পিন্ধিছিল, কেনেকুৱা কাপোৰ পিন্ধিছিল, কোনে কি কৈছিল, সকলোকথা পৰিস্কাৰভাৱে চাবলৈ, শুনিবলৈ চেষ্টা কৰক৷ আপুনি কি ৰঙৰ কাপোৰ পিন্ধিছিল, কি কৈছিল, কি কৰিছিল সকলো চাবলৈ যত্ন কৰক৷ আপোনাৰ তেতিয়া কেনে লাগিছিল আকৌ এবাৰ মনত পেলাবলৈ চেষ্টা কৰক৷ আপুনি দর্শক হিচাপে বহি স্ত্ৰিণত চাই আছে৷ যি অনুভৱ সেই সময়ত হৈছিল সেয়া আকৌ অনুভৱ কৰিবলৈ চেষ্টা কৰক৷ চকু নেমেলিব৷ যিমান সময় লাগে লওক, কিন্তু সম্পূর্ণৰূপে সেই আগৰ স্মৃতিটো আকৌ এবাৰ অনুভৱ কৰক৷
এতিয়া চকু মেলক আৰু মন কৰকচোন আপোনাৰ কেনে লাগিছে৷ এতিয়াতো আপোনাৰ আৰু বেয়া লাগি থকা নাই৷ মনটো যদি ভাল লাগিছে তেন্তেএতিয়া আপুনি নিজৰ কৰিবলগীয়া কামত লাগকগৈ৷