আপুনি ইম’চনেলি ইন্টেলিজেন্ট হয় নে নহয় চাও আহক
আপুনি সফল হ’ব বিচাৰিলে আৰু সুখী হ’ব বিচাৰিলে আপোনাক ইমোচনেল ইন্তেলিজেন্স লাগিব৷
ইমোচনেল ইন্টেলিজেন্স মানে আৱেগবোৰক বুজি পোৱা, ব্যৱহাৰ কৰা আৰু সেইবোৰক সঠিকভাৱে মেনেজ কৰিব পৰা সামর্থ৷ ই আপোনাক ষ্ট্ৰেছ নোহোৱা কৰিবলৈ, সঠিকভাৱে কমিউনিকেচন কৰিবলৈ, আনৰ লগত হোৱা কনফ্লিক্ট নোহোৱা কৰিবলৈ, প্ৰত্যাহ্বানৰ মুখামুখি হ’বলৈ, আনক বুজি পাবলৈ সহায় কৰে৷
এতিয়া আপুনি কিমান ইম’চনেলি ইন্টেলিজেন্ট সেয়া পৰীক্ষা কৰি চাও আহক-
(১) আপুনি আৱেগবোৰৰ কথা ভাবে
আপুনি তেতিয়াহে ইম’চনেলি ইন্টেলিজেন্ট হ’ব যেতিয়া আপোনাৰ আত্মসচেতনতা আৰু সামাজিক সচেতনতা থাকে৷ অকল আপোনাৰ নিজৰ আৱেগবোৰৰ কথাই নহয়, আপুনি আনৰ আৱেগবোৰৰ কথাও ভাবে৷ আপোনাৰ যদি খঙ উঠিছে, ভয় লাগিছে, মনটো বেয়া লাগিছে, আপুনি এইবোৰৰ কথা ভাবে আৰু তাৰ কাৰণবোৰ বুজিবলৈ চেষ্টা কৰে৷ তেনেদৰে আনৰ মনত কেনে ধৰণৰ আৱেগে এটা সময়ত ক্ৰিয়া কৰি আছে সেয়া আপুনি বুজিবলৈ চেষ্টা কৰে আৰু সেইমতে প্ৰতিক্ৰিয়া কৰে৷
(২) আপুনি নিজৰ চিন্তাবোৰক নিয়ন্ত্ৰণ কৰিবলৈ চেষ্টা কৰে
আপোনাৰ চিন্তাবোৰে আপোনাক নিয়ন্ত্ৰণ কৰাৰ সলনি আপুনি সেইবোৰক নিয়ন্ত্ৰণ কৰিবলৈ চেষ্টা কৰে৷ কি চিন্তা মনলৈ আহিছে সেয়া আপুনি লক্ষ্য কৰে আৰু প্ৰয়োজন অনুসৰি সেয়া সালসলনিও কৰিব পাৰে৷ ধৰি লওক কেতিয়াবা আপোনাৰ খঙ উঠিছে, তেতিয়া কাৰোবাক বেয়া ব্যৱহাৰ কৰাৰ সলনি, বেয়াকৈ কোৱাৰ সলনি আপুনি নিজৰ খঙটোক নিয়ন্ত্ৰণ কৰে৷
(৩) কথা কোৱাৰ আৰু কাম কৰাৰ আগতে আপুনি চিন্তা কৰে
কিবা এটা কোৱাৰ আগতে আপুনি চিন্তা কৰে আৰু তাৰ পিছতহে কথাটো কয়৷ তেনেদৰে কাম এটা কৰাৰ আগতে আপুনি ভাবি চিন্তি লয় আৰু তাৰ পিছত কামটো কৰে৷ এনে অভ্যাসে আপোনাক বেয়া, লাগ পাবপৰা পৰিস্থিতিৰ পৰা বচাই ৰাখে৷ লগতে আন মানুহে আপোনাৰ কাম বা কথাৰ দ্বাৰা মনত আঘাত নাপায়৷
(৪) আপুনি আনৰ কথা ভাবে আৰু বুজে
আন মানুহে কিয় এক বিশেষ পৰিস্থিতিত এক বিশেষ ব্যৱহাৰ কৰিছে সেয়া আপুনি বুজি পায় বা বুজিবলৈ চেষ্টা কৰে৷ আন মানুহৰ মানসিক স্থিতিৰ বইষয়ে আপুনি চিন্তা কৰে আৰু সেইমতে ব্যৱহাৰ কৰে৷
(৫) আপুনি ক্ষমা কৰে আৰু পাহৰি যায়
কোনোবাই আপোনাৰ বিপক্ষে কিবা বেয়া কৰিলে বা কিবা বেয়াকৈ ক’লেও আপুনি অনবৰতে সেয়া ধৰি নাথাকে৷ বৰঞ্চ আপুনি আপোনাৰ অন্যায় কৰা মানুহক ক্ষমা কৰি দিয়ে আৰু তেন নিগেটিভ ধৰণে আপোনাক প্ৰভাৱিত কৰিব পৰা কথাবোৰ পাহৰি যায়৷
(৬) আপুনি কথা দিলে কথা ৰাখে
আপুনি যদি কাৰোবাক কিবা কথা দিছিল আপুনি যিকোনো পৰিস্থিতিতে কথাটো ৰাখে৷ আপোনাৰ কথাৰ গুৰুত্ব আছে আৰু সেয়া আপুনি প্ৰতিবাৰেই প্ৰমাণ কৰে৷ কমিটমেন্ট কৰাৰটো আপোনাৰ বাবে ডাঙৰ কথা আৰু এবাৰ কমিটমেন্ট কৰিলে আপুনি তাক ৰক্ষা কৰে৷
(৭) আপুনি আনক সহায় কৰে
আপুনি যেতিয়া, যেনেকৈ পাৰে আন মানুহক সহায় কৰে৷ আন মানুহ বিপদত পৰিলে আপুনি কোনো ৰিটার্ণৰ আশা নকৰাকৈ তেওঁক সহায় কৰে৷
আপোনাৰ যদি এই লক্ষণবিলাক আছে তেতিয়াহ’লে আপুনি যথেষ্ট ইম’চনেলি ইন্টেলিজেন্ট৷
