আজিৰ দিনটোত যদি এটা ভাল ঘটনা আৰু এটা বেয়া ঘটনা ঘটিছে, আপুনি কোনটো ঘটনাৰ কথা ভাবি থাকে বাৰু? আপুনি কোনটো ঘটনাৰ কথা ভাবিব সেয়া নিজে বাচি ল’ব পাৰে৷ দিনটোত যদি কিবা বেয়া ঘটনা ঘটিছে আৰু ভাল ঘটনা নাই ঘটা তেতিয়া আপুনি বেয়া ঘটনাটোৰ কথা আৰু ভাবি নাথাকো বুলি সিদ্ধান্ত কৰিব পাৰে, সেয়া বাচি ল’ব পাৰে৷
তাৰমানে যিবোৰ বেয়া ঘটনা ইতিমধ্যে ঘটি গ’ল, যিবোৰৰ বিষয়ে চিন্তা কৰি আপুনি আৰু একো কৰিব নোৱাৰে, সেইবোৰক চিন্তা কৰি থাকিব নে নাথাকিব সেয়া আপুনি নিজে বাচি ল’ব পাৰে৷ সেই পচন্দটো আপোনাৰ৷
কোনোবাই আপোনাক কিবা বেয়াকৈ ক’লে, কাৰোবাৰ আপোনাৰ প্ৰতি ব্যৱহাৰ বেয়া আছিল; আপুনি তাকে ভাবি থাকিবনে নাই, খঙ উঠিবনে নাই সেয়া আপোনাৰ পচন্দ৷ এনেয়ে হয়তো আপোনাৰ খঙ উঠি থাকে, মন বেয়া লাগি থাকে, কিন্তু সেয়াও হৈছে সেই পচন্দটো আপুনি বাচি লোৱা বাবে৷ হয়তো গম নোপোৱাকৈ সেয়া বাচি লৈছে, কিন্তু পচন্দটো আপুনি নিজে বাচি লৈছে৷
তেনেবোৰ কথাক আপোনাৰ অনুভৱ আৰু প্ৰতিক্ৰিয়াক প্ৰভাৱিত কৰিব নিদিয়াটো আপোনাৰ পচন্দ হ’ব পাৰে৷ আপুনি মানুহৰ ব্যৱহাৰ, চিন্তা আদি সলাব নোৱাৰে, কিন্তু আপুনি নিজৰ ব্যৱহাৰ আৰু প্ৰতিক্ৰিয়া সদায় বাচি ল’ব পাৰে৷ আনকি মন বেয়া লগা অৱস্থাতো, খঙ উঠা অৱস্থাতো আপুনি নিজৰ ব্যৱহাৰ আৰু প্ৰতিক্ৰিয়া বাচি ল’ব পাৰে৷
আৰু এনেবোৰ কথাই নিশ্চিত কৰিব আপুনি সুখী হ’ব নে দুখী হ’ব৷
যিবিলাক কথা আপোনাৰ বাবে ভাল, যিবোৰ কথা পজিটিভ সেইবোৰ কথা বাচি লওক৷ ই আপোনাক সুখী হ’বলৈ সহায় কৰিব৷
তেনে কৰাটো সহজ নহয়৷ ই টান, কষ্টকৰ৷ আৰু সেয়ে বেছিভাগ মানুহেই তেনে নকৰে৷ কিবা এটা বেয়া ঘটিলে আমি তাক নিজৰ মনটোক প্ৰভাৱিত কৰিবলৈ নিদিয়াকৈ থকাটো সহজ নহয়৷ কোনোবাই বেয়া ব্যৱহাৰ কৰিলে আমাৰ প্ৰতিক্ৰিয়াটো পজিটিভ কৰি ৰখাটো ইমান সহজ নহয়৷
কথাটো আৰু টান হৈ পৰে নিগেটিভিটি বায়াছৰ বাবে৷ নিগেটিভিটি বায়াছৰ বাবে আমি নিগেটিভ কথাবোৰ বেছিকৈ মন কৰো, মনত ৰাখো, ভাবো৷ সেইবিলাক কথা মনত কৰি ভাল পাও; নিগেটিভ খবৰবোৰ শুনি, দেখি, পঢ়ি বেছি ভাল পাও৷ কিন্তু সেয়া লাহে লাহে সলনি কৰিব পাৰি৷
কিছুমান কাম কৰিলে আপুনি অলপ হলেও সহজে সুখী হ’ব পাৰিব৷
যিবিলাক কামে আপোনাক সুখী কৰে দিনটোত এটা হলেও তেনে কাম কৰক
আপুনি যিবোৰ কাম কৰি ভাল পায় তেনে কামবোৰ অলপ সময় হলেও কৰক৷ গান শুনা, পঢ়া, চিনেমা এখন চোৱা ইত্যাদি সকলোৰে এটা পজিটিভ প্ৰভাৱ আছে৷ আপুনি তেনে ধৰণৰ ভালপোৱা কাম এটা অলপ সময় হলেও কৰক৷ মনটো ভাল লগা মানে দিনটোও ভালেৰে যাব৷ আৰু এটা এটা দিনৰ সমষ্টিয়ে জানো আমাৰ জীৱনটো নহয়?
কিবা এটা ভাল বিচাৰিবলৈ চেষ্টা কৰক
যিকোনো পৰিস্থিতিতে, ঘটনাতে কিবা এটা ভাল বিচাৰিবলৈ চেষ্টা কৰক৷ ই সহজ কাম নহয়৷ কিন্তু অভ্যাস কৰি গৈ থাকিলে এটা সময়ত সেয়া কৰিব পাৰি৷ তাৰবাবে মনটোক জোৰ দি সেই কামটো কৰিবলৈ ক’ব লাগিব “ইয়াত ভাল কি আছে?” এনেদৰে বাৰে বাৰে এইটো প্ৰশ্ন কৰিলে মনটোৱে তাৰ উত্তৰ উলিয়াই দিব৷ পিছলৈ অভ্যাস হ’লে যিকোনো পৰিস্থিতিতে আপুনি নিজৰ বাবে ভাল কিবা বিচাৰি পাব৷
সমস্যাতকৈ সমাধানৰ ওপৰতহে গুৰুত্ব দিয়ক
সমস্যাবোৰ যেতিয়া উৎপন্ন হ’ব তেতিয়া সেইবোৰৰ ওপৰত গুৰুত্ব দিয়াতকৈ কিদৰে সেইবোৰ নোহোৱা কৰিব পাৰি তাৰ ওপৰতহে গুৰুত্ব দিয়ক৷ দুয়োটাৰে মাজত সামান্য পার্থক্য আছে কিন্তু দুয়োটাৰে ফলাফলৰ মাজত আকাশ-পাতাল পার্থক্য আছে৷ সমাধানৰ ওপৰত গুৰুত্ব দিলে আপুনি ইতিমধ্যে নিগেটিভ সমস্যাটোতকৈ পজিটিভ সমাধানৰ ওপৰতহে গুৰুত্ব দিছে৷ লগতে সমস্যাটোৰ সমাধান কৰিব পাৰিলে আপোনাৰ আত্মবিশ্বাস বাঢ়িব, মনটো ভাল লাগিব আৰু ই আপোনাক সুখী কৰিব৷
কি কৰিলে সেয়া চাওক
আপুনি এতিয়ালৈকে দিনটোত কি কি কাম কৰিলে চাওক৷ যদি ভাল কাম কৰিলে, বহুত কাম কৰিলে তেন্তে সেই কথাটোৱে আপোনাক অলপ সুখী নকৰিবনে? তেনেদৰে জীৱনত এতিয়ালৈকে কি কি ভাল কাম কৰিলে, কিমান কৰিলে সেয়া চাওক৷ সেই কথাটোৱেও আপোনাক সুখী হ’বলৈ কিবা অলপ হলেও কথা যোগান ধৰিব৷