এই সমস্যাটোৱে আমাৰ সকলোৰে জীৱনত কেতিয়াবা নহয় কেতিয়াবা দেখা দিব পাৰে৷ কিছুমান ডাঙৰ সমস্যা আমাৰ জীৱনত দেখা দিয়ে আৰু সেইবোৰ এনেকুৱা হয় যে আমি কেতিয়াবা সেইবোৰৰ বিষয়ে একো সিদ্ধান্ত কৰিব নোৱাৰো বা কোনটো কৰিলে ভাল হ’ব সেয়া নাজানো৷ ফলত আমি তাক আওকাণ কৰা বা এভইড কৰা আৰম্ভ কৰোঁ৷
কেতিয়াবা আমি কাৰোবাৰ লগত পাতিবলগীয়া কথা এটা আওকাণ কৰো, কেতিয়াবা টেলিফোন কল এটা এভইড কৰোঁ, কেতিয়াবা ডাঙৰ কাম এটা, কেতিয়াবা ডাঙৰ প্ৰজেক্ট এটা এভইড কৰোঁ৷
কিন্তু এনেদৰে আওকাণ কৰাৰ বাবে ই আমাৰ জীৱনত নানা সমস্যাৰ সৃষ্টি কৰে৷ আমাৰ কামবোৰ পৰি থকাৰ লগতে, মানুহে আমাক বেয়া পায়, আমাক বিশ্বাস নকৰা হয়৷ তাতোকৈ ডাঙৰ কথা – আমি নিজকে বিশ্বাস কৰিব নোৱাৰা হও, নিজৰ আত্মসন্মান কমি যায়৷
আমি এনেদৰে কিছুমান কাম আওকাণ কৰাৰ বা পিছলৈ পেলাই থোৱাৰ মূলতে কিন্তু আছে কামটোৰ প্ৰতি আমাৰ মনত থকা ভয় ভাৱ বা নিগেটিভ ভাৱ৷ কিন্তু কথাটো হ’ল এই ভাৱবোৰ আমাৰ মনতহে আছে, দৰাচলতে এইবোৰ নাই, মাত্ৰ আমি নিজে নিজৰ মনত সৃষ্টি কৰি লৈছোঁ৷
কেনেদৰে কৰিব
কামবোৰৰ এখন তালিকা কৰি লওক
কি কি তেনে কাম আছে যিবোৰ আপুনি আওকাণ কৰি আছে বা এভইড কৰাৰ চেষ্টা কৰি আছে, সেইবিলাকৰ এখন তালিকা তৈয়াৰ কৰি লওক৷ তালিকাখন কৰাৰ লগে লগে আপোনাৰ মূৰৰ বোজাটো অলপ হলেও কমি যোৱা যেন অনুভৱ হ’ব৷
এটা কাম বাচি লওক
আজিৰ বাবে মাত্ৰ এটা কাম বাচি লওক৷ এটাতকৈ বেছি তেনে কাম বাচি ল’লে ই আপোনাৰ বাবে বেছি অশান্তিকৰ হৈ উঠিব পাৰে৷ আৰু তেনে হ’লে আপুনি সেই কামটো নকৰাৰ সম্ভাৱনা বেছি৷ গতিকে তালিকাৰ পৰা এটা কাম বাচি লওক৷
এটা সিদ্ধান্ত লওক
বাচি লোৱা কামটোৰ ক্ষেত্ৰত এটা সিদ্ধান্ত লওক আৰু সেইটোকে খামুচি ধৰি থাকক৷ অৰ্থাৎ সেয়া আৰু সলনি নকৰিব৷ যদি কাৰোবাৰ লগত কিবা কথা এটা পাতিব লগীয়া আছিল, পাতক৷ কাৰোবাক ফোন এটা কৰিবলগীয়া আছিল, কৰক৷ যি হয় হ’ব, মাত্ৰ কামটো কৰক৷ যদি কিবা এটা প্ৰজেক্ট বা কাম কৰিব নে বাদ দি দিব সেই বিষয়ে সিদ্ধান্ত এটা কৰিবলগীয়া আছিল, সেই সিদ্ধান্তটো এতিয়াই কৰক৷ চিন্তা নকৰিব, কামটোৰ ফলাফল হয়তো ভাল হ’ব বা বেয়া হ’ব৷ এই দুটাৰ কিবা এটা হ’ব৷ আপুনি যদি অলপ মনটো টান কৰি দুয়োটা ফলাফলৰ বাবে নিজকে সাজু কৰি লয়, তেতিয়া ই আপোনাৰ বাবে টান নহ’ব৷
ও, কেতিয়াবা আপোনাৰ সিদ্ধান্তটো ভুল হ’ব পাৰে৷ যদি ভুল হয় তেতিয়া তাক সলাই পেলাব৷ কিন্তু এটা সিদ্ধান্ত লওতে বহু সময় নলগাব আৰু বাৰে বাৰে তাক গুনা গথা কৰি সলাই নাথাকিব৷ সিদ্ধান্তটো লোৱাটো ডাঙৰ কথা৷
কামটো কৰাৰ পিছত চাওক কি হ’ল৷ আপুনি ভয় কৰাৰ দৰে সকলো ধ্বংস হৈ গ’ল নেকি? নাই হোৱা৷ সকলো ঠিকে আছে, আপুনিহে অযথা সেই কামটো কৰিবলৈ ভয় খাই আছিল৷ বেছিভাগ কামৰে ক্ষেত্ৰতে ই সত্য৷ মাত্ৰ আপুনিহে কিছুমান নিগেটিভ চিন্তা কৰি কামবোৰ পিছলৈ পেলাই গৈ থাকে৷ অকণমান আত্মবিশ্বাস বঢ়াব পাৰিলে এই সমস্যাটো নোহোৱা হৈ যাব৷