মই কেনেদৰে নিজকে আৰু বেছি ভাল কৰিব পাৰোঁ
নিজকে আৰু ভাল কৰি তুলিবলৈ এটা সহজ উপায় আছে৷ সেই উপায়টো হ’ল কনটিনিউয়াছ ইমপ্ৰুভমেন্ট৷ অর্থাৎ ক্ৰমাগত উন্নতি৷
আপুনি যদি নিজকে আৰু ভাল কৰি তুলিব বিচাৰে, আজিতকৈ ভাল হ’ব বিচাৰে তেন্তে সেয়া কৰিবই লাগিব৷
আৰু বহুত বেছি ভাল হ’ব নালাগে, মাত্ৰ কালিতকৈ আজি আৰু অলপমান ভাল হ’লেই হ’ল৷ কাইলৈ আজিতকৈ অকণমান, একেবাৰে ক্ষুদ্ৰকৈ ভাল হ’লেই হ’ল৷ এনেদৰে অলপ অলপকৈ ভাল হৈ গৈ থাকোতে থাকোতে এইবোৰ লগ হৈ এদিন অতীতৰ ৰূপটোৰ লগত আজিৰ ৰূপটোৰ বহুত ডাঙৰ পার্থক্য দেখা যাব৷
কিন্তু কথাটো হ’ল কি কি কথাত, কোনফালে মই ভাল কৰিবলৈ চেষ্টা কৰিম? সকলো কথাবোৰ মই নিশ্চয় ভাল কৰিবলৈ চেষ্টা কৰিব নোৱাৰোঁ? হয় সকলো ফালেই আপুনি ভাল কৰিবলৈ একেলগে চেষ্টা কৰিব নোৱাৰে আৰু সকলো কথাতে ভাল কৰিবলৈ চেষ্টা কৰাৰো প্ৰয়োজন হয়তো আপোনাৰ নাই. আপুনি মাত্ৰ দুটা কথা মন কৰিলেই হ’ল-
(১) কোনবোৰ কথাত আপুনি ভাল নহয়, কিন্তু আপোনাৰ বাবে সেইবোৰ প্ৰয়োজনীয়৷ যদি আপোনাৰ বাবে এইবোৰ প্ৰয়োজনীয় তেন্তে সেইবোৰ ক্ষেত্ৰত আপুনি ভাল কৰিবই লাগিব৷ তেনে প্ৰয়োজনীয় কথাবোৰ শিকাত, স্কিলবোৰ শিকাত আপুনি মনোযোগ দিব লাগিব৷
(২) কিছুমান কাম আপুনি জানে, কিছুমান কথাত আপুনি ভাল বা কিছুমান স্কিল আপোনাৰ আছে কিন্তু এইবোৰ আপুনি বিচৰা সফলতাৰ বাবে বৰ গুৰুত্বপূর্ণ৷ তেন্তে এইবোৰ আৰু ভাল কৰাত, আগতকৈ স্কিলবোৰ বঢ়োৱাত আমি গুৰুত্ব দিব লাগিব৷
কথাবোৰ, স্কিলবোৰ আপোনাৰ বাবে প্ৰয়োজনীয় হয় নে নহয় সেই কথাটো চাই ল’ব৷ প্ৰয়োজনীয় হলেহে সেইবোৰত আপুনি গুৰুত্ব দিব লাগিব৷ যিহেতু আমৰ সময়, শক্তি, মনোবল সীমিত গতিকে আমি সকলো কথাতে ভাল হ’বলৈ চেষ্টা নকৰি, সকলোবোৰ কথাকে ভাল কৰিবলৈ চেষ্টা নকৰি আমাৰ বাবে যিবোৰ গুৰুত্বপূর্ণ আৰু প্ৰয়োজনীয় সেইবোৰ কথাত মন দিব লাগিব৷